“Clean Energy Cəbrayıl” MMC və “Baku Steel Company” QSC (bundan sonra – BSC) arasında günəş enerjisi təchizatı haqqında anlaşma memorandumu imzalanıb. Anlaşma çərçivəsində “Clean Energy Cəbrayıl” MMC mövcud elektrik şəbəkəsi vasitəsilə BSC-ni bərpaolunan enerji ilə təchiz edəcək.

“Caspian Energy Media” xəbər verir ki, Cəbrayıl rayonunun Soltanlı kəndində inşa ediləcək layihə 100 MVt gücündə günəş enerji stansiyasının tikintisini ehtiva edir və hər biri 50 MVt olmaqla iki hissədən ibarətdir: Şəms və Üfüq günəş stansiyaları. İstehsal olunan günəş enerjisi yerli sənaye müəssisələrinin enerji ehtiyaclarını qarşılamaq məqsədi daşıyır.

Sözügedən layihə “Clean Energy Invest” MMC-nin “Clean Energy Cəbrayıl” və “Nobel Energy”nin “Enerso” şirkətləri vasitəsilə həyata keçiriləcək. Bu tərəfdaşlıq hər iki tərəfin Azərbaycanın yaşıl enerjiyə keçid strategiyasını dəstəkləməyə və ölkənin dayanıqlı inkişaf məqsədlərinə töhfə verməyə hazır olan ortaq öhdəliyini nümayiş etdirir.