Caspian Energy Media “Azərbaycan İnvestisiya Şirkəti”nə istinadən xəbər verir ki, “Azərbaycan İnvestisiya Şirkəti” ASC, İsrailin “Granot International Agricultural Cooperative Society” LTD və “Agro Food Investments” MMC arasında ilkin mərhələdə 1000 hektarlıq zeytun bağının salınması və illik 4000 ton istehsal gücündə müasir zeytun yağı emalı zavodunun qurulmasına dair Anlaşma Memorandumu imzalanıb.

Layihə çərçivəsində 50-yə yaxın yeni iş yerinin yaradılması nəzərdə tutulur.

Caspian Energy Media Milli Hidrometeorologiya Xidmətinə istinadən xəbər verir ki, Bakıda və Abşeron yarımadasında hava şəraitinin dəyişkən buludlu olacağı, əsasən yağmursuz keçəcəyi gözlənilir. Gecə və səhər bəzi yerlərdə zəif duman olacaq.

Havanın temperaturu gecə 11-15° isti, gündüz 19-24° isti olacaq.

Rayonlarda bəzi yerlərdə arabir yağış yağacağı gözlənilir. Ayrı-ayrı yerlərdə leysan xarakterli olacağı, şimşək çaxacağı, dolu düşəcəyi, yüksək dağlıq ərazilərdə qar yağacağı ehtimalı var.

Havanın temperaturu gecə 10-15° isti, gündüz 20-25° isti, dağlarda gecə 1° şaxtadan 3°-dək isti, gündüz 5-10° isti olacaq.

Azərkosmos qlobal coğrafiya informasiya sistemləri təminatçısı “ESRI” şirkəti ilə anlaşma memorandumu imzalayıb.

Caspian Energy Media “Azərkosmos”a istinadla xəbər verir ki, əməkdaşlığın məqsədi Azərbaycanda tədqiqat və təhsil təşəbbüslərində coğrafi informasiya məlumatlarının istifadəsini təşviq etməkdir.

Memorandum çərçivəsində Bakı Mühəndislik Universiteti, Bakı Dövlət Universiteti və Elm və Təhsil Nazirliyi nəzdində Torpaqşünaslıq və Aqrokimya İnstitutuna “ESRI” şirkətinin coğrafiya informasiya sistemlərinin proqram təminatı üzrə lisenziyaların verilməsi təmin olunub.

Daha ətraflı: https://azercosmos.az/az/media-center/news/az-rkosmos-v-esri-aras-nda-memorandum-imzalan-b

Mayın 18-də İstanbulda Türk İnvestisiya Fondunun təsis iclası keçirilib.

Bu barədə Caspian Energy Media iqtisadiyyat nazirliyinə istinadən xəbər verir.

Türkiyə, Azərbaycan, Qazaxıstan, Qırğızıstan və Özbəkistan tərəfindən yaradılmış Türk İnvestisiya Fondunun təsis iclası keçirilib, Fondla Türkiyə Respublikası arasında "Ev Sahibi Ölkə Müqaviləsi" imzalanıb. Bundan başqa, Azərbaycandan namizədliyi təqdim edilmiş Ramil Babayev Fondun Baş direktoru seçilib.

Caspian Energy Media AZERTAC-a istinadən xəbər verir ki, Londonun ICE (“InterContinental Exchange Futures”) birjasında “Brent” markalı neftin bir barelinin qiyməti 0,33 dollar artaraq 84,31 dollar olub. Nyu-Yorkun NYMEX (“New York Mercantile Exchange”) birjasında “Light” markalı neftin bir barelinin qiyməti isə 0,2 dollar artaraq 80,26 dollar təşkil edib.

Nyu-Yorkun COMEX əmtəə birjasında qızılın bir troya unsiyasının qiyməti 0,98% artaraq 2 441 ABŞ dollarına bərabər olub.

Caspian Energy Media APA-ya istinadən xəbər verir ki, COMEX-də gümüşün bir unsiyasının qiyməti isə 3.86% artaraq 32.47 ABŞ dollarına bərabər olub.

2024-cü ilin aprel ayında respublikada gündəlik neft (kondensatla birlikdə) hasilatı 596 min barel olub.

Caspian Energy Media energetika nazirliyinə istinadən xəbər verir ki, bunun 476 min barelini xam neft, 120 min barelini kondensat təşkil edib.

Qeyd edək ki, “OPEC plus” ölkələri nazirlərinin 36-cı iclasında əldə edilmiş razılaşmaya görə, 2024-cü il üçün Azərbaycanın hasilat kvotası gündəlik 551 min barrel təşkil edir.

Azərbaycan Asiya-Sakit Okean Turizm Assosiasiyasının (PATA) Çinin Makao şəhərində keçirilən illik sammitində təmsil olunur.

Bu barədə Caspian Energy Media Azərbaycan Dövlət Turizm Agentliyinə istinadən xəbər verir.

"Liderlərin Dialoqu: Gələcəyə əsaslanan Səyahət və Turizm Siyasətləri" adlı panel müzakirəsində çıxış edən Florian Zenqstşmid Azərbaycanda məsuliyyətli və dayanıqlı turizmin inkişafı məqsədilə atılan addımlardan,  Basqal kimi icma əsaslı turizmin inkişafı ilə bağlı icra olunan uğurlu dövlət layihələrindən,   “Xınalıq və Köç yolu mədəni landşaftı”nın UNESCO-nun Ümumdünya İrs Siyahısına salınması nümunəsindən danışıb.

Caspian Energy Media Azərbaycan Dövlət Turizm Agentliyinə istinadən xəbər verir ki, 16 May 2024-cü il tarixində Azərbaycan Turizm Bürosu “China Outbound Tourism Research Institute” (Çin Xarici Turizm Araşdırmaları İnstitutu) tərəfindən təşkil olunmuş “Chinese Tourist Welcome Award 2024” (Çin Turist Qəbulu Mükafatı) müsabiqəsində “Potensial turizm destinasiyası” kateqoriyasında birinci yerə layiq görülüb.

Qeyd edək ki, 2023-cü ildə Azərbaycana səfər edən Çin vətəndaşlarının sayında 2022-ci ilə müqayisədə 6 dəfədən çox artım müşahidə edilib.

Çinin Quançjou şəhərində keçirilən “GİTF 2024” (Quançjou Beynəlxalq Turizm Sərgisi) sərgisində 16-18 may 2024-cü il tarixlərində ilk dəfə ölkəmizin turizm imkanları sərgilənir.

Bu barədə Caspian Energy Media Azərbaycan Dövlət Turizm Agentliyinə istinadən xəbər verir.

Sərgidə ölkəmizi Azərbaycan Turizm Bürosu ilə birgə “Azərbaycan Hava Yolları”, “Şahdağ” Turizm Mərkəzi və Qoruqları İdarəetmə Mərkəzi daxil olmaqla, ümumilikdə 6 yerli tərəfdaş təmsil edir.