Ölkənin aparıcı korporativ maliyyə institutu “PAŞA Bank” “Azərbaycanda iqlim maliyyəsi: Davamlı iqtisadi inkişaf yolları” adlı konfrans keçirib. Bu barədə “Caspian Energy Media“ya “Paşa Bank“dan  bildirilib.

23 oktyabr tarixində Bakıda baş tutan tədbir BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına (COP29) həsr olunub. Konfrans Azərbaycanın 2030-cu ilə qədər sosial-iqtisadi inkişafı üçün milli prioritetlər kontekstində iqlim maliyyəsi məsələlərinin əhəmiyyətinə fokuslanıb. 

Konfransın işində energetika nazirinin müavini və COP29-un icraçı direktoru Elnur Soltanov, iqtisadiyyat nazirinin müavini Anar Axundov, BMT Qlobal Sazişinin Azərbaycan üzrə rəhbəri Samir Məmmədov, “Azerbaijan Green Energy Company”nin maliyyə direktoru və idarə heyətinin üzvü Xəyalə Nağıyeva, “Deloitte Azərbaycan”ın idarəedici partnyoru Nuran Kərimov, bir sıra beynəlxalq ekspertlər, 100-ə yaxın sahibkar və real sektorun təmsilçiləri iştirak ediblər.

Xatırladaq ki, “PAŞA Bank” 2023-cü ildə BMT Qlobal Sazişinin üzvü olub. Bankın “2024-2026-cı illər üçün Korporativ Sosial Məsuliyyət (KSM) strategiyası” həmin qlobal təşəbbüsün Dayanıqlı İnkişaf Məqsədlərinə (DİM) uyğun tənzimlənib. Həmin DİM-lərin arasında “iqlim dəyişikliyinə qarşı mübarizə” sahəsi xüsusi yer tutur və Bank cari strateji dövr ərzində bu istiqamət üzrə fəaliyyətini genişləndirmək niyyətindədir.